በአፋርና ሶማሊ ክልል አዋሳኝ ቦታዎች ያለው ውጊያ አሳሳቢ ነው- ኢሰመኮ 

ዓርብ ሰኔ 07 ቀን 2016 (አዲስ ማለዳ) በአፋር እና ሶማሊ ክልል አዋሳኝ አካባቢዎች የተኩስ አቁም ስምምነቱ ተጥሶ የተጀመረው የትጥቅ ውጊያ እንዲሁም የንጹሀን ጉዳትና መፈናቀል እንዳሳሰበው የኢትዮጵያ ሰብዓዊ መብቶች ኮሚሽን አስታወቀ።

ከባለፈው ሳምንት ሐሙስ ግንቦት 30 ቀን 2016 ጀምሮ በአካባቢው ወደ ትጥቅ ውጊያ ያመራ ውጥረት መከሰቱን በተመለከተ መረጃዎች እንደደረሱት ኢሰመኮ ገልጿል።

ኮሚሽኑ ከአፋር እና ሶማሊ ክልል አመራሮች እንዳረጋገጠው በአዋሳኝ አካባቢው “አልፎ አልፎ” ውጊያ ተከስቷል። በውጊያውም ቁጥራቸው በመግለጫው ያልተጠቀሱ ንጹሀን ሰዎች መጎዳታቸው እና መፈናቀላቸው ተጠቁሟል።

የኢሰመኮ ምክትል ኮሚሽነር ራኬብ መሰለ ግጭቱ በአስቸኳይ እንዲቆም የሁለቱ ክልል አስተዳደሮች ዝግጁ በመሆናቸው የፌደራል መንግስቱ ተጨማሪ ድጋፍ እንዲያደርግ ጠይቀዋል። በተጨማሪም ተፋላሚዎች በኢድ አል አድሃ በዓል መንፈስ ተግባብተው ውጊያው እንዳይባባስ እና ንጹሀን እንዳይጎዱ እንዲያደርጉ ጥሪ አቅርበዋል።

በድንበርተኞቹ የአፋር ሕዝቦች እና ኢሳ በሚል መጠሪያ በሚታወቁት በሶማሌ ክልል የሚኖሩ ጎሳዎች መካከል የሚነሱ ግጭቶች ሚያዝያ 10 ቀን 2016 የኢትዮጵያ እስልምና ጉዳዮች ጠቅላይ ምክር ቤት ባዋቀረው 25 አባላት ያሉት የእርቀ ሰላም ኮሚቴ አማካኝነት የተኩስ አቁም ስምምነት ለማድረግ ተስማምተው እንደነበረ አዲስ ማለዳ መዘገቧ አይዘነጋም።